Países, Escolas e Persoas construíndo a Paz

Países, Escolas e Persoas construíndo a Paz

by Cesar Herrero Proxectos destacados

Países, Escolas e Persoas construíndo a Paz é un proxecto eTwinning desenvolvido dentro dunha Asociación Estratéxica KA2 do programa Erasmus+ no que participan os seguintes centros escolares, Collège Victor Hugo, Lavelanet, Francia, Liceo Monna Agnese, Siena, Italia e IES Carles Salvador, Aldaia, España. Trátase dun proxecto para analizar o contexto europeo actual e concienciar o alumnado sobre os instrumentos e valores para xestionar de forma pacífica e eficiente os conflitos sociais, económicos e ambientais.

Amparo Gras Roselló, coordinadora do proxecto no IES Carles Salvador de Aldaia, resúmenos todas as fases que se abordaron durante o desenvolvemento deste ambicioso proxecto. Un exemplo moi útil para outros centros escolares que desexen traballar unha Asociación Estratéxica KA2 na plataforma eTwinning.

Temática e obxectivos do proxecto

Desde a observación do contexto europeo e mundial actual, constatamos a presenza do conflito en distintos ámbitos: conflitos bélicos que dan lugar a problemas de sostibilidade social, conflito do ser humano co medio natural derivado dun modelo de desenvolvemento e crecemento económico que xera problemas de sostibilidade ambiental, presenza de identidades diversas que xeran conflitos no ámbito educativo, social e persoal. Os conflitos non son xestionados de forma pacífica pola falta de instrumentos para facelo: coñecementos, actitudes e valores de unión, participación, diálogo, tolerancia e cohesión.

Partindo destas consideracións os centros educativos desta asociación escolar decidimos traballar a PAZ co proxecto que leva por título:

PAÍSES, ESCOLAS e PERSOAS CONSTRUÍNDO A PAZ.

 

actividad_paz_alumnos

Os obxectivos son:

– Coñecer mellor os conflitos, bélicos ou non, do s. XX e actuais en Europa.

– Coñecer e explorar iniciativas de unión, de concordia, de construción de paz desenvolvidas no s. XX e s. XXI en Europa.

– Coñecer as manifestacións e expresións artísticas en relación ao tema en cada país.

No ámbito das comunidades educativas; escolas e persoas:

– Coñecer, comparar e analizar as causas e as consecuencias dos conflitos dentro das diferentes escolas.

– Coñecer e compartir as diferentes iniciativas de resolución de conflitos e sobre todo de unión e cohesión interna que se estean a desenvolver nos diferentes centros e analizar os resultados da súa aplicación.

– Elaborar un banco de recursos e ferramentas para a construción da paz nas nosas comunidades educativas.

– Explorar iniciativas sociais nos nosos contornos próximos e mostralas.

– Crear unha comunidade de prácticas respecto ao tema.

– Utilizar para comunicar e compartir espazos colaborativos virtuais (blogs, páxinas web, eTwinning, Twinspace) e redes sociais.

Idade do alumnado participante:  13, 14 e 15 anos.

Áreas curriculares e contidos que se abordaron

Educación para a Cidadanía e os DDHH, Francés Lingua Estranxeira e Español Lingua Estranxeira:

  • Memoria histórica: relacións entre Francia, España e Italia.
  • Coñecemento da Declaración Universal dos DDHH.
  • Valores: a empatía, a solidariedade, a defensa da dignidade persoal, a educación son necesidades humanas. Neste aspecto é importante a colaboración con ONG que traballan tanto no ámbito internacional coma nacional, e, fundamentalmente, local.
  • Bioloxía:
  • Coñecemento das técnicas da agricultura tradicional e a agricultura ecolóxica para a creación dun horto escolar.
  • Coñecemento e aplicación dos 3 R no instituto para a creación dun grupo ambiental encargado da educación ambiental diaria de todos os sectores.
  • Lingua Castelá e Literatura, Francés e Italiano:
  • Viaxe literaria ao longo do século XX. Achegamento á creación artística froito da experiencia vital e existencial dos escritores-as que viviron diferentes períodos conflitivos individuais e/ou colectivos: a poesía existencial, social e de vangarda; a novela social, experimental; o teatro de protesta, do absurdo ou experimental.
  • Comprensión de como o contexto histórico-social determina a cosmovisión do creador-a e como as distintas técnicas e ferramentas son froito deses condicionantes político-social-económico e culturais (artísticos-literarios)

Temporalización (fases) e metodoloxía escollida para o desenvolvemento do proxecto.

CURSO 2014/15

 

blog_países, escuelas y personas

OUTUBRO 2014:

NOVEMBRO 2014:

DECEMBRO 2014: encontro e reunión transnacional en Aldaia:

  • Presentación oficial do proxecto.
  • Veredicto do concurso do logotipo
  • Obradoiros de horto escolar, de medio natural e reciclaxe.
  • Obradoiro de receitas típicas e vocabulario no mercado de Aldaia e coa colaboración dos seus comerciantes.
  • Avaliación.

XANEIRO, FEBREIRO e MARZO 2015:

  • Posta en marcha do traballo para a creación dos hortos escolares en Italia e España.
  • Posta en marcha dos grupos ambientais en España e Francia.
  • Expertos sobre o terreo: historia e sociedade nos últimos 100 anos nos nosos países, entrevistas aos nosos maiores e creación dun eixe cronolóxico co resultado das entrevistas e investigacións. Traballo sobre a película A lingua das bolboretas.
  • Creación dunha conta en Twitter para o proxecto: @paisajedepaz.
  • Videoconferencias Skype entre o alumnado que vai participar no seguinte encontro.
  • Convocatoria da sección internacional do concurso xornalístico Roberto Romaldo en Siena.

ABRIL 2015:

  • Posta en marcha da viaxe literaria, a voz da memoria nos países socios.
  • Preparación do encontro en Siena.
  • Encontro e reunión transnacional en Siena. Realización de obradoiros colaborativos internacionais: obradoiro de música (análise da letra e canto de Bela Ciao), obradoiro de Twiliteratura sobre A lingua das bolboretas de Manuel Rivas, obradoiro de elaboración de carteis de todas as especies de plantas do “Xardín da sombra”, obradoiro de análise interlingüística (francés, italiano, portugués, español, romanés, …), obradoiro de xornalismo,… traballos finais e inauguración oficial do “Xardín da sombra”, FlashMob da Paz na Piazza di Campo de Siena. Creación do grupo pechado de Facebook do proxecto. Avaliación.

MAIO 2015:

  • Veredicto do concurso xornalístico Roberto Romaldo.
  • Conexión por Skype para a cerimonia de entrega de premios.

XUÑO 2015:

  • Avaliación e seguimento do primeiro ano do proxecto.

CURSO 2015/16

SETEMBRO E OUTUBRO 2015:

– Reunións dos equipos.

– Continuación das actividades iniciadas o curso pasado e posta en marcha nos centros que non o fixeron: hortos escolares e grupos ambientais.

– Inscrición do novo alumnado en eTwinning.

– Presentación dos novos grupos.

NOVEMBRO E DECEMBRO 2015:

– Preparación do encontro en Lavelanet:

  • Cada centro prepara unha presentación cos programas que se desenvolven nestes para promover a integración e a convivencia.
  • Actividades propias de cada centro que contribuirán aos produtos finais:
  • Aldaia: Visita ao refuxio do IES Luís Vives e do Concello e ruta pola Valencia Capital da República. Traballo sobre migracións, refuxio e asilo.
  • Lavelanet: Preparación do encontro.
  • Siena: Traballo sobre migracións, refuxio e asilo. Visita á exposición de Milán.
  • Cada centro realiza un informe de noticias con tres núcleos temáticos:
  • Noticias sobre inmigración.
  • Noticias sobre medio natural.
  • Noticias sobre asociacións que promovan a sostibilidade ambiental e/ou social.

Do 12 ao 19 de decembro de 2015: encontro e reunión transnacional en Lavelanet

XANEIRO A MAIO 2016:

De xaneiro a abril: preparación do encontro en Aldaia.

Do 3 ao 10 de maio: Encontro en Aldaia:

  • Recital “A paz está nas túas mans”.
  • Carreira solidaria e obradoiros de preparación.
  • Itinerario en grupos internacionais pola Valencia Capital da II República.
  • Participación nas xornadas de formación do profesorado “Entre a memoria e a historia” na Facultade de Xeografía e Historia.
  • Obradoiro sobre a liberdade de expresión con Amnistía Internacional.
  • Obradoiro sobre o manifesto contra o pacto da Unión Europea e Turquía sobre a xestión da crise humanitaria das persoas refuxiadas.

Maio:

  • Siena: Veredicto do concurso xornalístico Roberto Romaldo co tema: “Arricchiamoci delle nostri recipprochi diferenze” “As nosas diferenzas enriquécennos”
  • Aldaia: Proxecto “Un berro polos refuxiados”

Materiais desenvolvidos

Algúns exemplos dos materiais e resultados:

Avaliación e difusión do proxecto

Beneficios para o centro, os docentes e mais o alumnado.

A internacionalización do centro e a cooperación entre escolas, alumnado e profesorado de diferentes países ampliou a conciencia intercultural, a cidadanía activa e o pensamento crítico. A incorporación de prácticas innovadoras (métodos, ferramentas de aprendizaxe colaborativa, uso das TIC, recursos educativos abertos, aprendizaxe centrada no alumno, redes sociais, eTwinning…, ). O alumnado e mais o profesorado mellorou a competencia en linguas estranxeiras e a competencia dixital. Aumentou a motivación fronte ao traballo diario, o desexo de aprender e seguir colaborando con centros educativos europeos.

 

Amparo Gras Roselló

IES Carles Salvador, Aldaia. Centro coordinador do proxecto.

Comunidade Valenciana.

 

 

eTwinning e KA1: Proxecto ‘Job Shadowing in Action’!

eTwinning e KA1: Proxecto ‘Job Shadowing in Action’!

by Cesar Herrero Proxectos destacados

Promovendo de forma eficiente sinerxías en Erasmus + un grupo de profesores da Szkoła Podstawowa núm. 6 de Zabrze (Polonia) e do colexio FEDAC Prats de Lluçanès (España) realizou unha enriquecedora experiencia de ‘Job Shadowing’ a través da plataforma eTwinning. Carme Pellicer, coordinadora do proxecto no centro escolar español cóntanos como se foi construíndo esta experiencia e os seus beneficios para toda a comunidade educativa.

Todo empezou cando recibín un correo de Joanna da escola ZP6 de Zabrze, en Polonia, no escritorio de eTwinningLive. Nel expoñíame o seu proxecto Job Shadowing e o desexo do seu equipo de profesores de levalo a cabo na nosa escola: FEDAC Prats. Os obxectivos principais eran aprender outra lingua (o español), outra cultura e observar para aprender novos métodos de aprendizaxe para aplicalos no seu centro.

Unha vez compartida a súa idea cos meus compañeiros, non dubidamos nin un momento en lanzarnos a unha nova aventura europea. Sería o noso primeiro contacto con Erasmus+ despois de moitos proxectos eTwinning. Estabamos absolutamente decididos a dar un paso máis. Pensamos, e estabamos no certo, que se nos ofrecía unha grande oportunidade para lle dar sentido a un dos nosos obxectivos de centro: alcanzar a dimensión europea. Unha excelente ocasión para compartir experiencias, debater ideas, colaborar e aprender entre iguais de forma presencial cos profesores de Zabrze.

Durante o segundo semestre do curso 2014-2015 mantiven contacto constante e comunicación con Joanna, a coordinadora do centro de Polonia. Había moito que facer: organización do proxecto, planificación da estadía…

Cando estabamos organizando o curso 2015-16 o claustro de profesores de FEDAC Prats acordamos por unanimidade que, aínda que se trataba dun Job Shadowing, os nosos alumnos tamén estarían implicados de forma moi directa no proxecto. Deste modo, decidimos planificar o Job Shadowing como un Proxecto de Centro para o curso 2015-16 e integralo no currículo cos obxectivos competenciais correspondentes. Ademais queremos salientar que o proxecto integrou dúas formacións no centro: un curso de español para os profesores de Zabrze e un Obradoiro eTwinning para os profesores de FEDAC Prats.

Así foi como lles comunicamos aos nosos alumnos que tería lugar un Job Shadowing na nosa escola: Primeiro, Sorpresa! Despois, Entusiasmo!

 

O proxecto ía medrando e tomando forma paseniñamente. Era coma un crebacabezas no que todas as pezas son clave para conseguir o resultado desexado. A partir dunha idea construímos unha realidade.

Creamos o proxecto eTwinning: Job Shadowing in Action! https://twinspace.etwinning.net/8439/home (enlace ao TwinSpace) asociado ao Erasmus+. Un espazo ideal para reunir as actividades, que con moitísima ilusión e non menos entusiasmo, realizaron os alumnos e un lugar idóneo para a comunicación entre os profesores, para compartir experiencias, colaborar, debater e xestionar o proxecto.

En febreiro chegou por fin a semana do Job Shadowing. Iámonos coñecer en persoa! Era un evento moi esperado para todos. A mobilización foi total, xa non só por parte de toda a comunidade educativa, senón tamén por parte do Departamento de Educación da Generalitat de Cataluña, do equipo directivo de FEDAC, do Concello, de diferentes asociacións culturais de Prats de Lluçanès, das canles de televisión rexionais e mais da prensa. Tivo unha acollida magnífica. Tamén queremos facer referencia á videoconferencia realizada entre representantes dos SNA de España e Polonia, os equipos directivos e as coordinadoras do proxecto de ambos os dous centros, foi moi interesante. A todos debemos agradecerlles o acompañamento e mais a súa xenerosa colaboración.

 

Banners de las respectivas visitas
Banners das respectivas visitas

Resulta difícil atopar palabras para describirmos o que sentimos cando tivemos o primeiro encontro cos vinte profesores da escola SP6 de Zabrze. Todos estabamos moi emocionados. Foi máxico e intenso. Enseguida se orixinou unha corrente de simpatía e boa sintonía recíproca. Todos estabamos moi motivados para que o período de observación na nosa escola FEDAC Prats fose unha experiencia do máis enriquecedora para as dúas partes. E foino.

Os profesores de Polonia eran de distintas especialidades de primaria. Ademais de observar, prepararon clases para os nosos alumnos. Unha fonte de inspiración para todos. Aí a dimensión europea estaba asegurada. O idioma non foi un problema significativo xa que nos comunicabamos en español (fixeran un curso) e inglés. Ademais, o seu profesor de español facíalles de tradutor cando o necesitaban.

Este é un breve resumo do que aconteceu durante a visita dos profesores de Polonia.

 

 

Que distinto é poder falar e discutir sobre un tema en persoa! Cando as actividades de colaboración teñen lugar nunha clase real e non virtual. Este é o plus do programa Erasmus+.

O proxecto aínda non rematou. A comunicación non diminúe nin tampouco as actividades. Todos, profesores e alumnos, esperamos con anhelo as videoconferencias que levamos a cabo regularmente. A amizade e os bos recordos son magníficos.

Unha experiencia vivida con intensidade por parte de todos. Unha magnífica oportunidade para aprender entre iguais. Recomendable cen por cen!!!

Como un dos obxectivos do Job Shadowing era a observación das metodoloxías de aprendizaxe de FEDAC Prats, aí está Iza falando en nome dos seus compañeiros de SP6 de Zabrze. Unhas palabras, que unha vez máis, nos emocionan e nos chegan ao corazón. Esperamos poder realizar moitos máis proxectos xuntos.

 

Fonte das imaxes: TwinSpace do proxecto ‘Job Shadowing in Action’!

Fairy Yoga. Premios nacionais eTwinning 2016

Fairy Yoga. Premios nacionais eTwinning 2016

by Cesar Herrero Premios eTwinning 2015

Fairy Yoga é un proxecto eTwinning no que o ioga para nenos serve de inspiración para o traballo e as actividades na aula de Educación Infantil. No proxecto participan centros escolares de España, Italia, Turquía, Eslovaquia, Polonia e Xeorxia. A práctica do ioga preséntase como unha actividade lúdica na que o alumno, a través de diversas posturas asociadas a sons e nomes de animais, mellora a flexibilidade e a coordinación. Apréciase unha boa comunicación entre os socios de proxecto, o que permite un traballo ben planificado e uns resultados que cumpren cos obxectivos iniciais propostos. Destacamos a participación no proxecto de expertos no ámbito do ioga que asesoran e traballan de forma directa coas docentes participantes. Tamén subliñamos o papel activo das familias, que comparten actividades do proxecto cos alumnos e gravan as prácticas na casa. Todos os produtos finais son accesibles desde o TwinSpace de proxecto, unha páxina en Facebook e a propia páxina do centro escolar. Finalmente, destacamos a exhaustiva avaliación final de proxecto que inclúe enquisas, cuestionarios e arquivos de son para os profesores e fichas para colorear para os alumnos.

Fuensanta León Moreno, coordinadora do proxecto na Escola Barrufet (Sant Boi de Llobregat) descríbenos os obxectivos e mais os resultados do proxecto no seu centro escolar e achega interesantes opinións de alumnos, pais e compañeiros do centro que participaron activamente nesta experiencia.

Sobre os obxectivos e os resultados do proxecto

Os obxectivos que nos formulamos cando iniciamos este proxecto foron os seguintes:

  • Iniciar os nenos/as no ioga e divertirse facéndoo
  • Ofrecer un método de autodescubrimento e axuda para desenvolver as súas capacidades
  • Favorecer as habilidades sociais
  • Fomentar a creatividade e a imaxinación
  • Mellorar a autoestima
  • Explorar novas metodoloxías
  • Axudalos/as a que empecen a sentir a lingua inglesa como instrumento importante de comunicación
  • Potenciar a participación das familias compartindo actividades de ioga cos seus fillos/as
  • Utilizar as TIC como vehículo de comunicación familias/ outros centros

Os resultados foron moi positivos a todos os niveis.

Os nosos alumnos/as puideron compartir sesións de ioga con nenos/as doutros países.

 

Fairy Yoga sesión Skype

Experimentaron con diferentes linguaxes (plástica, musical, corporal, audiovisual, matemática,…) fomentando así a súa creatividade e a imaxinación. É moi gratificante ver que son quen de cantar cancións e coñecer e dicir o nome en inglés das posturas que se traballaron.

foto collage 1 fairy yoga

Tamén valoramos positivamente que as familias participaran activamente e que en todo momento apoiaran este proxecto.

 familia_fairy_yoga

Conseguiuse un maior coñecemento e autonomía persoal dos nosos alumnos/as, unha mellor dinámica de grupo, puidemos experimentar con novas metodoloxías, habituándonos ao uso das TIC e iniciándonos no traballo colaborativo, sen esquecer divertirnos todos/as xuntos practicando ioga.

fairy_yoga_juego_peluche

O desenvolvemento do proxecto en termos de acertos, erros e dificultades

Unha das primeiras dificultades que atopamos cando iniciamos o proxecto era que na actualidade existen poucas experiencias onde se realice ioga nas aulas. Era algo pioneiro que nos levou a buscar bibliografía existente en referencia á práctica do ioga con nenos/as e axudounos moito todo o material que compartiron os outros socios europeos. Atopar eTwinning permitiunos iniciar o proxecto e intercambiarmos experiencias.

 

fairy_yoga_asamblea

A colaboración foi un elemento necesario para o bo funcionamento do proxecto. Todas achegamos algo para que funcionase e que se cumprisen os obxectivos. Tivemos que realizar moitas reunións extras para organizar as sesións, os recursos persoais e técnicos, realizar a avaliación, etc. Outro dos retos foron as videoconferencias xa que nalgunha delas houbo problemas técnicos que fomos solucionando coa axuda do noso coordinador TAC e mais coa nosa experiencia.

Por primeira vez no noso ciclo pedíaselles ás familias que participasen nun proxecto achegando vídeos ou fotografías, aspecto que non tiñamos moi claro que fose funcionar e que resultou ser todo un éxito. Gustaríame salientar que sempre atopamos un grande apoio por parte do equipo directivo e polo equipo de educación infantil.

Sobre o impacto global do proxecto no centro escolar

“Fairy Yoga” é un proxecto sostible que causou un impacto importante nas metodoloxías das escolas implicadas. Conseguiu os obxectivos formulados con actividades facilmente integrables no currículo de calquera centro. Participar neste proxecto permitiu propoñer a inclusión do ioga no currículo de educación infantil da escola como actividade habitual nos seguintes cursos, este ano xa se está realizando en P4 e o próximo realizarase en P5.

fairy_yoga_practice

A temática utilizada (animais de peluche, xogo de cartas Eduyoga, a nosa fada do ioga) facilitou a motivación polas actividades e por coñecer novo vocabulario en inglés. Os nosos nenos e nenas viñan moi contentos/as ás sesións de ioga e conseguimos que aprendan as primeiras palabras e cancións en inglés.

As videoconferencias e actividades para facilitar a comunicación permiten que exista a interacción entre iguais. Os nosos alumnos gozaron moito durante todo o proxecto pero en especial nos momentos das videoconferencias onde podían ver, falar e realizar os exercicios de ioga cos seus amigos europeos.

 

sesión Skype Fairy Yoga

A introdución de ferramentas TIC en cada actividade achegounos un amplo abano de posibilidades para investigar e colaborar e reflectiuse nunha mellora clara dos procesos de ensino-aprendizaxe. Os alumnos aprenderon de xeito diferente, integrándoas naturalmente na práctica diaria.

Conseguimos que unha gran maioría de familias participe no noso proxecto e realizasen ioga cos seus fillos/as na casa.

 

Fairy_yoga_en_familia

Compartiu connosco o seu saber facer e mais a experiencia a profesora de ioga Aurora Fernández Gutiérrez, unha persoa externa á nosa escola, que cada ano vén pechar o noso proxecto facendo ela a clase de ioga cos nosos nenos/as. Ela foi tamén a que durante este curso veu realizar sesións de ioga con todo o claustro.

Aurora_Fairy_Yoga

Para rematar, querería transmitir que na actualidade existe unha inquietude xeral de todo o claustro que ten moi claro que a educación mellora mediante a colaboración, o intercambio e a aprendizaxe mutua: entre alumnos/as, entre mestres/as e entre sociedades.

Yoga con el claustro

Sobre o recoñecemento deste proxecto como premio nacional eTwinning 2016

Foi unha experiencia moi positiva onde me estreaba como usuaria desta gran plataforma que é eTwinning. A título persoal o recoñecemento deste proxecto supuxo unha grande alegría e ver cumprido uns dos meus soños profesionais de poder incluír o ioga nas nosas aulas. E desta forma conseguir que paseniñamente se vexa o ioga como un elemento de cambio educativo positivo que axuda os nosos alumnos/as a desenvolver as súas capacidades dentro dun marco baseado no respecto, a tolerancia e a comprensión.

 

fairy yoga_actividad_grupal

É o recoñecemento a un traballo feito con moita ilusión, un traballo en equipo onde se empregaron moitas horas de descanso persoal nun momento onde os recortes orzamentarios aínda non mingúan a capacidade de ilusión de moitos profesionais que aman e gozan da súa profesión.

Opinións

Derek Martínez Boch (3 anos)

A min gustoume moito facer as posturas do león e mais o can.

Paula Molina Martínez (3 anos)

O que máis me gustou son as sorpresas que traía a Fada do ioga.

 

Fairy Yoga Hada

Souad Bobouh (nai dun neno de P3)

É unha actividade que vexo positiva xa que permite traballar o corpo e a mente, proporciona máis flexibilidade, reláxaos e cálmaos. Fai que os nenos e as nenas sexan máis creativos. Na casa o meu fillo Akram pídeme que fagamos ioga e facemos algunhas das posturas, gústalle moito.

Javier Huertas e Ana Castro (pais dun neno de P3)

Este primeiro ano na escola supuxo para os nenos e as nenas o descubrimento dunha morea de cousas, emocións, xogos e as clases de Fairy Yoga foron un destes grandes descubrimentos. Concretamente, para Gerard supuxo unha forma máis de bailar, aprendendo animais, psicomotricidade e unha cousa moi diferente: o inglés.

Gerard está moi motivado, o feito de acompañar esta aprendizaxe do idioma con música e ioga, cremos que foi a clave principal, que conseguiu que palabras como “butterfly” estean dentro do seu vocabulario habitual e que tamén perdera o medo a falar con palabras que inicialmente non coñecía. A día de hoxe o noso fillo non ten ningún medo en intentar cantar cancións en inglés, intentando imitar os sons e pronuncias que escoita. Nós consideramos que foi un éxito total.

Eugenia Fernández Rodríguez (directora da Escola Barrufet)

Xa hai tempo que desde o equipo directivo pensabamos que era importante introducir a Educación Emocional de xeito transversal no currículo da escola. Despois da experiencia de Fairy Yoga constatamos os seus beneficios e sentímonos moi orgullosas dos resultados obtidos.

Esther Rodríguez Serradilla (mestra de Inglés e compoñente do Proxecto)

“Fairy Yoga” foi un reto e unha oportunidade. Grazas a eTwinning puidemos facer ioga e introducir vocabulario en inglés e escoitar outras linguas. Valoro especialmente decatarme de que xuntas podemos facer cousas que xamais cremos posibles: motivar cambios na escola pero sobre todo axudar a que os nenos e as nenas sexan máis felices.

Esperanza Hernández Burcio (mestra de P3 e compoñente do Proxecto)

Compartir a experiencia na aula con outra mestra é enriquecedor e moi positivo xa que hai poucas ocasións onde se poidan compartir situacións coma as que vivimos.
O alumnado gozou e como consecuencia fixeron colaborar as súas familias. Estou encantada de poder continuar facendo Fairy Yoga.

Enlaces a resultados do proxecto

-TwinSpace

http://twinspace.etwinning.net/2114/home

-Blogger

http://estherrsbcn.blogspot.com.es/

-Revista despois de Fairy Yoga

http://www.calameo.com/read/0045765221cab1509faea

-Continuidade en P4:English and Yoga in P-4

https://sites.google.com/a/xtec.cat/barrufets-english-zone/general-activities/englishandyogainp-4

-Vídeo resumo

https://vimeo.com/168655717

-Artigo Revista dixital “E-eduquem” (páxina núm. 23)

http://plataformaeduca.es/revista/otono2015/eduquem_otono_2015_hoja.pdf

 

PROXECTO “FAIRY IOGA”

Escola Barrufet (Sant Boi de Llobregat)

Educación Infantil

Esther Rodríguez Serradilla

Esperanza Hernández

Fuensanta León Moreno

 

 

The incredible life of Marcus Poncius Eropaeus

The incredible life of Marcus Poncius Eropaeus

by Cesar Herrero Proxectos destacados

Este elemento non está dispoñible no idioma solicitada. Desculpe. For the sake of viewer convenience, the content is shown below in the alternative language. You may click the link to switch the active language.

The incredible life of Marcus Poncius Europaeus es un proyecto eTwinning-Comenius en el que participan centros escolares de España, Italia, Turquía, Francia, Grecia y Polonia. El objetivo es crear la biografía de un personaje de ficción que viaja por Europa en la época romana, pero con la particularidad de usar el lenguaje de los medios de comunicación contemporáneos. Continuar leyendo →

El reconocimiento de los proyectos eTwinning

El reconocimiento de los proyectos eTwinning

by Cesar Herrero Reconocimientos eTwinning

Este elemento non está dispoñible no idioma solicitada. Desculpe. For the sake of viewer convenience, the content is shown below in the alternative language. You may click the link to switch the active language.

Pilar Antolín Sanz, miembro del Servicio Nacional de Apoyo eTwinning, nos describe en el siguiente vídeo las distintas formas de reconocimiento de la participación en proyectos eTwinning. Continuar leyendo →